من الشهر للشهر..عيشة قنديشة
من الشهر للشهر..عيشة قنديشة
هذا ما كتبه المربي الفاضل حاتم عمرو من قلقيلية.الضفة الغربية على صفحته الشخصيه ..
خطتي التقشفية للشهر القادمة... . كل يوم ربطتين خبز ب ٨ شيكل ومواصلات على المدرسة ٨ شيكل. و١٠ كيلو جنحان دجاج ب ٦٠ شيكل للشهر كله وكيلو بندورة لطول الشهر ب ١٠ شيكل وفاتورة كهرباء ب ١٠٠ شيكل بس لغرفة الصالون واذا واحد من الأولاد بظوي غرفة ثانية يا ويله وصهريج ماء ب٢٠٠ شيكل انا بتحمم كل أسبوعين مرة والأولاد كل أسبوع مرة. وشامبو من الرخيص ب ٢٠ شيكل وحبة صابونة نابلسي وحبة عبد النبي للجلي ب ٨ شيكل وعلبة زيت بزري ب ٢٥ شيكل. وكيس أرز مخلوط مع فريكة ومفتول ب ٥٠ شيكل.. وبزر عباد ب ٥ شيكل لام علي مشان تتغلب على الوقت ونت من شركتنا الوطنية ب ٢٥ شيكل مشان انزل صورتي على الفيس.. وكيلو قهوة للضيوف من البرازيلية الشهيرة ب ٤٠ شيكل وكيلو شاي الغزالين ب ٤٠ شيكل. وزعتر ب ١٠ شيكل بكفي وعلبة زيت زيتون ببلاش لاني من عرقي جبتها. ومواد مطهرة وكمامات ب ٢٠ شيكل بكفي وسكر ١٠ كيلو ب ٣٠ شيكل. وحمص والبان ب ٤٠ شيكل بعمروالثلاجة طول الشهر. ملابس عندنا واحذية ما بدي. ولنفرض اجاني ضيف ٥ كيلو جنحان حبش ب ٤٠ شيكل طبعا من الرخيص. ودخان بطلت اشتري يخلف على شجرة التين ومن أوراق دفاتر التحضير بلف. وجرة غاز ب ٦٢ شيكل. وبهارات للطبيخ وخاصة العدس ب ١٠ شيكل. و٥ كيلو عدس ب ٤٠ شيكل. وفجل ببلاش الأستاذ عادل دودين بوخذ منه ربطة.. هذا بعد حساب دقيق بطلعوا ١٥٠٠ شيكل. بظل من الراتب ٣٠٠ احتياط للزنقات.. والدواء ان شاء الله ما بنحتاجه ولو احتجنا دين وكشفية الدكتور ببلاش كل الاطباء اصحابي. والعملية بأجلها لما ربنا يفرجها واذا الله بوخذ اوداعته بكون وفر ت ثمن العملية والحمد على كل حال... المهم الوطن يظل بخير..
تعليقات
إرسال تعليق