هنا سكت الشيخ ولم يسأله اي سؤال..؟!
يقوولون قبل كان شيخ عشيرة زلمه ومعدل بس بيه عيب واحد لمن يجيه ضيف يطَلِّع روحه بكثرة الأسئلة ولحد ما الناس ضاجت وملَّت وصارت تبتعد عنَّه وما تروح لمضيفه وبيوم من الأيام أجه لعشيرتهم شاب ذكي گال وسأل وين مضيف الشيخ؟؟
الناس صاحت عليه... عمي إنت شموديك للشيخ غير يطلع روحك بالأسئلة قللهم ما عليكم آنا أجاوبه!!
وصل للمضيف وبعد الترحيب وتقديم واجب الضيافة بدأ الشيخ بالأسئلة مالته :
عمي انت من ياعمام: جاوبه الشاب من العشيرة الفلانية
قلَّه الشيخ والنِّعم ومنو شيخكم؟؟
قلَّه الشاب شيخ فلان
رد الشيخ يسأل قلَّه: وشلونه شيخكم؟؟
جاوبه الشاب : شيخنا يستحي؟؟
هنا الشيخ سكت وما سأل أي سؤال بعد؟؟
تعجبوا الناس إل گاعدين لأنهم متعودين من الشيخ يسأل على كل شي وبقى الشاب عدهم ساعة وبعدين رجع لديرته
هنا الشياب وجوه العشيرة إل گاعدين بالمضيف سألو الشيخ:
شعجب إنت ماكثرت بالأسئلة على الضيف وأكتفيت بجوابه عن شيخهم يستحي؟؟
جاوبهم: گلهم كلمة اليستحي جامعتهن كلهن
اليستحي ماتنهضم عشيرتة وأخوته
واليستحي مايبيع أبن عشيرته
واليستحي لازم عنده حظ وبخت
واليستحي عنده غيرة على عشيرته وأبنائها لأن الماعنده غيرة عليهم ماعنده غيره على عيالة
واليستحي مايبوك ولا يغدر
واليستحي ماينافق على الناس
واليستحي مايصير جبان
واليستحي مايصير بخيل
واليستحي ما يجذب
واليستحي معدل بكل تصرفاته
واليستحي لازم يبتعد عن كل ردِية
واليستحي يخاف الله واليخاف الله سهمك منه الراحة
فسلامي على كل إنسان....يستحي
ونسأل الله تعالى أن يجعلكم من اهل هذه الصفات
تعليقات
إرسال تعليق